中產生活點滴

呢日，全日都係學滑雪。上午8AM 就起身，先浸個温泉，再去食個豐富早餐，準備就緒。今日既天氣認真一般，下雨。不過對於我，就可能係好事，因為個滑雪場好少人，相對好似無咁驚撞到人。原來真正的滑雪，一D都唔簡單。首先對鞋同對 SKI，好重。齋行，都已經覺得有D難度，唔好話滑。仲要控制方向， Speed, 等，對於我呢D無乜運動細胞的人，相當困難。只是上咗上午班，已經累到阿媽都唔認得。好彩我係報私人班，如果唔係，真係阻慢晒阿Sir 的進度。我哋個阿 Sir 係 New Zealand 人，已經係日本住咗4個月，專程留係二世古邊教滑雪，邊自己渡假。 一到12點放lunch, 我立刻除左對鞋，返房休息，飯都可以唔食，因為真係好累。不過最後都係有食野，因為驚無力挨落去，錢又比左，唔可以晒。所以去左酒店二樓食個拉面。中間休息呢半個鐘真係好緊要，下午班好似順利好多。開始我以坐 lift 上去初級雪道自已滑落去。呢一刻，我先覺得滑雪係好玩，之前係上午，真係諗，點解要貼錢買難受，好彩我無放棄。 一路滑吓滑吓，原來已經成5點鐘，好累啦，決定今日到此為止，明天請早。就返去浸個温泉，準備出去食晚飯。我哋行吓行吓，揾到間好 local 的炭火燒飯店，舖頭細細，但係坐滿人，原因好簡單，就係D野食好味道同價錢實惠。食咗好多嘢，都係三仟円左右，抵!

第二天，一早起身就退房，去左JR站換個 Hakkaido JR Pass，今次買左個4日 flexible Pass , 係十日裡面任坐4日。今日的行程就係食個早lunch, 然後就坐 Ski Express 去二世古滑雪。 因為都有2小時， 所以決定去二条魚市場食早飯。睇地圖好似唔係好遠，所以決定行去。沿途都見到D景點，好以時計台、電視塔等。原來去到魚市場，都已經就黎12時，所以好快咁食個 Don 就趕火車。不過個 Don 好好味，有北海道出名的海膽、帶子、三文魚子同蟹肉，加埋個蟹湯，好滿足。不過好味要付出代價，要成2,350円一set, 計起都要成$200 港紙。呢個早飯，一D都唔簡單! 跟住就坐 JR 去滑雪聖地 - 二世古。今次係我第二次滑雪。對上過次已經係4年前都係在北海道滑，所以都唔記得晒點滑，心情都有D緊張。我地 Book 左 Hilton Niseko Resort, 佢一日得4班 Shuttle Bus, 夾唔到我班 JR 時間，所以只好坐 Taxi，15分鐘車程，要成 2000円，都頗貴。 Check in 完，差不多3pm ，立刻 check 下D 滑雪班咩時間同價錢。原來每日的班都係分上午 10am - 12pm 同1pm-3pm 。所以 catch 唔到即日的下午班，所以報咗第二日的全日班 (即上下午都學，共4小時)。私人班 $32,000円。係就係貴咗D，不過可以學識，都值得。報完班，就乘酒店 Shuttle Bus 出市中心走走，免費既。係市中心食完 Dinner，就回酒店泡温泉，個露天温泉，超正，連住個湖，一邊睇住D錦鯉遊水、落住雪，一邊就暖昱昱嘆温泉，人生一大享受!